Aaj kal bahut kuchh chal raha hai zindagi mein. Kabhi kuchh naya hota hai to , jo pehle kabhi socha hi nahin tha... aur kabhi wahi puraani yaadein waapis aa jati hain, jo laga tha ab bhulana aasaan hoga .

Zindagi bhi ajeeb hai. Kabhi chaashniki tarha tumhare saweron mein ghul kar , raaton ko bhi mithaas de jati hai. Aur phir kabhi ankahe toofaan ki tarha aakar, wo sab saath uda le jaati hai jo tinka - tinka bunkar jodaa tha.

Ummeedein karna bhi zindagi hi sikhati hai. Bachpan mein bachcha apne maa baap se khilaune ki ummeed karta hai, bade hokar jawaani mein wahi khilaune , unke saath rehne aur do pal unke samay ko apna banane ki ummeed mein badal jaate hain.

Budhapa bhi ummeedonmein hi nikal jaata hai. Ki, kab ek haath badhkar tumhaare kaapte haathon ko aa pakde.

In sabhi ummeedon ke beech chhupi hoti hai ek uljhan. Jo humein sikha jaati hai, agar ummeedein samay rehte poori na ho to kis hadd tak ek thehra huaa sheher bikhar jaata hai, aur reh jaata hai to sirf shanti aur chuppi.

In uljhanon ke beech khayalon ka ek jaal sa bun jaata hai. Jo kab dheere - dheere tumhein hi apne lapete mein le - le, pata hi nahin chalta.

Ek baar is jaal mein phas kar nikalna itna aasaan nahin . Har roz khayalon aur khwabon ka ek naya roop, haath pakad kar kuchh aise waapis kheenchta hai, maanon bas, ab yahin apni duniya simat kar reh jayegi aur peechhe reh jayega wo sheher jiski tumne kabhi Kalpana ki thi.

Waqt rehte agar ye uljhan na suljhi, to shayad phir kabhi koi bachcha ye ummeed na kar sakega ki uske haathon mein ek khilaune ki chaahat hai, jawaani ki sidhi par khade vyakti ke mann mein apne maa - baap ke samay aur unke saath ki laalsa phir kabhi nahin aayegi aur phir shaayad kabhi bhi koi koonpta haath, kisi sahaare ko na khojega.

~ Tanya